Wandern rund um Frankfurt

Wanderung Burg Frankenstein am 22.03.2011

Wanderbericht von einem einheimischen Mitwanderer!

Doo hobbter de Uffsazz iwwer des was mer da mal annem scheene Daach fern Ausfluch gemachd howwe. (am beschede Ehr leesd des laud vor, weil mers geschwetzt besser vesteit als geschriwwe)

Unn sou hots aagefange unn iss dann weidergange:

Getroffe unn Hend geschiddelt, Jagg doogelosse, loosgelaafe,

Iwwer die Brigg, dorsch Ewerscht, am Fridhouf vebei, dorsch de Wald, iwwer noch e Brigg. Des blauwe Bee gefunne, als dem noochgelaafe, de Bersch enuff, geschwizzd, sisch faschd naggisch gemacht. Net verlaafe !!

Owwe aakumme, net hiesezze kenne, weil als noch aaner hot Foddos mache misse ! Uff de Terass gesesse, kald Bier gedrunge, aaner hot Woi hawwe misse un en annern hot kaa Wasser gewollt. Sunn uff de Berzel brenne losse.
Guuud gesse, veschiidene Gerischde, unn Kaffee aach noch. Dann widder nunner, uffenem annern Weesch. Uff Malsche geloffe, mitm elegdrische Abberaad gezaggert, dann doch noch Foarkadde kriet.
Midde Strooßeboan uff de Ewwerschter Platz wos dann e Eiß gewwe hot. Des Eiß howwer mer dann uffem Weesch zurigg aa gesse. Do sin mer an de Bach langgelaafe. Dann wormer doo. Hawwe uns ins Biro gesetzt unn wern gern draus gebliwwe. Wonn all midmache, mache mer des nochemool. Villeicht wuu annerschter hie ?

Grieß von dem der wu des alles hot desdeweesche uffschreiwe misse damit nix vegesse geit.

Darmstadt anno 22 März 2011